Zwäiefùffzig Lüt stöön ùff dr Lischte

ùnd wänn bìzitte ab ùff d Phischte.

Drùm hògge si – ùnd daas mit Gnùss –

schò vòr dr Frìscht im ‚Eurobùss‘.

Dr Ussflùùg vò dr Männerrììgi

11. Mai 2011

Die Schaar sìn d Riigeler mit Begläitig,

s ‚Erna W.‘ übernìmmt drìnn d Läitig

mìt rueiger Stìmm ùnd ìnnerem Füür

ùnd dr Hèèr ,Fröhlich’ sìtzt hìnters Stüür.

S Wätter ìsch häiter, verschafft is Elaan,

esoo brättere mr ìm Gaar über d Autibaan

bìs zùm ‘Räbstògg‘ ìm Dòrf ‚Wiedlisbach‘.

Döört höör i, s Schriibe sig für hütt mi Fach.

Dr ‚Joe‘, als Schriiber sùnscht e Glatte,

laufi hütt frèmd bì de Wanderratte.

‚Dr Schnüüfeler‘ könn schrègglig übertriibe

ùnd d ‚Eva‘, si häigi gnueg vòm Schriibe.

D Rììgi ìn dr Bäiz‘, dr Kaffi ìsch bstèllt –

‚dr Schnüüfeler‘ vòr e Daatsach gstèllt!

Käi Bäi seet me doo drüüber stuune,

drfüür Köpf mìt Gìpfeli bì bèschter Luune.

Witers goots – alli zämme bìnenand –

ùff ‚Rächthalte‘ zue ìm ‚Sänsen-Ooberland‘,

zem Strau-Atelier: Sini Pròdùggt sìn äifach guet,

alles uss Strau, vò Fuessschmùgg bìs Huet.

Me hèt Fòttene gschòssen ìn däm Laade,

die züüge vònere Strauhuet-Baraade.

Nìt see kaa mes Gstänggli vò dr Gülle,

wò duet bìm Bschütte d Ruumlùft ussfülle.

Wärs bèsser, wùrde d Raaser ìn ììrer Faase,

äim zümpftig bìm Raase ìn d Naase gaase? –

Dien mr dòch dä Gedangge verwäärfe

ùnd lieber e Blìgg ùff d Geegend döört wäärfe.

S ‚Erna‘ ùnd dr Schofföör, beidi zämme,

dien punggto Erlüterige Gedangge stämme:

Är mäint, schloofe ìm Strau statt ùff Madratze,

häisst weeniger schloofe, drfüür mee gratze.

Das Duo, e jeede drvoo ùff sini äigeni Art,

versprìcht is nòne ganz e schööni Faart

dùrs s Friiburgerland bìs ùff ,Greyerz‘ ùffe,

dangg ere Faarwiis, wò nìt zviil Mòscht duet vrbùffe.

Nò bevòòr me sìch däm Mool zuewändet,

gìts dr Aperò, vòm Eehbaar Müller gschbändet.

Es het wääge dr Gsùndhäit miesse basse,

ziet abers IIzaalte nümm ùss dr Kasse.

Als Dangg drfüür, wònis am Häärze lìggt,

wìrd ene ùss ‚Greyerz‘ e Kaarte gschìggt.

Mr hòffe, es wìrd em glii wìder bèsser goo,

ùnd ass si s Jòòr drùff wìder könne koo.

Mìr hän alsò säll Ässe häärzlig gnòsse

ùnd s Gschlùggte drzue au wüürdig begòsse.

Mr hän fascht alles ghaa ùsser em Gnòggi

ùnd faare drnoo witer ìn Rìchtig Schòggi.

Z ‚Broo‘ aggeret men ùffeme bsùndere Fäld:

Dr Wìrtschaftszwiig ‚Schòggi‘, är bedüttet Gäld.

S ‚Maison Cailler‘ bedüttet als Zèntrùm dr Sìtz,

ùnd z viil Schòggi ìm Maage: Bedüttet z viil Hitz!

Die Bhauptig lòsst sìch bewiise – phèrsee –

ich ha mi bìm Uusegoo grad dreimool gsee.

Phèrbläx bin ich drùff in Gaar iine gsässe,

mìt dr Hòffnig, bìm Häifaare dä Vòòrfall z vrgässe.

D Stadt Bäärn, dää eedli schwizer Stäärn,

hèt me bì Stau nùmme nò halb sò gäärn.

Dòch dr fröölìgi ‚Fröhlich‘ wäiss allewiil Root

ùnd faart döört dùùre, wòs vorwäärts goot.

Soo kùnnt äär phünggtlìg z Baasel aa,

ass me dr Matsch rueig luege kaa.

Dää Daag ìsch hèèrlig gsìì – äi Gnùss.

Danggbar de ‚Macher‘ mach iich au Schlùss.

Dòch nò zwäi Noochsètz:

Für äimool bìn ich in d Lùgge gsprùnge

ùnd hòff, dä Sprùng, äär siigi mr glùnge.

‘C‘est du provisoire qui dure’, das döörf nìt sii;

dr Schriiber schribt – doo bliib i drbii!

Dr Schnüüfeler

Zurück zur Startseite

Zurück zur Startseite

Die hischtòrischi Òrtschaft ìsch e Juweel

ùnd wìrggt ìn ììrem Gsamte phèrfäggt ùff d Seel.

Ìm ‚Hòtel de Ville‘, das wärde mr nie vrgässe,

griegt me e bsùnders feins Mittagässe.